தொழுவுரம்

அறிவியலோடு அறிமுகமாகும் இயற்கை விவசாயம்!

''தொழுவுரம் எப்படி தயார் செய்கிறீர்கள்..?'' என்று கேட்டோம். மொத்த மாணவர்களும் போட்டிப்போட... அனைவரின் சார்பாக 9-ம் வகுப்பு மாணவன் சத்யா ஆர்வமுடன் பேசினான்.

''காய்ஞ்ச நிலத்துல ஆறு அடி நீளம், ரெண்டரை அடி அகலம் கொண்ட இடத்தைத் தேர்ந்தெடுத்து... அதுல தென்னமட்டைகளைப் பரப்பி வைக்கணும். அதுக்கு மேல காய்ஞ்ச இலை தழைகள பரப்பணும். அதுக்கு மேல மாட்டு சாணம், கோமியம் கலந்த கெட்டியான கரைசல பரவலா ஊத்தணும். அடுத்ததா, தண்ணியில 24 மணிநேரம் ஊற வெச்ச மரக்கரியைப் பரவலா போடணும். இது கார்பன் சத்துக்கு. அடுத்ததா, வேப்பிலை, ஆடு, மாடுகள் சாப்பிடாத பச்சை இலை, தழைகளைப் போடணும். இது நைட்ரஜன் சத்துக்காக. அடுத்ததா, சாம்பல், சுண்ணாம்புத் தூள் ரெண்டையும் கலந்து போடணும். இது தாது சத்துக்களுக்காக. அதுக்கு மேல பச்சை தென்ன ஓலைகளை அடுக்கணும். இதுல தினமும் தண்ணி தெளிச்சுட்டு வரணும். 25 நாள் கழிச்சு கம்பால கொத்தி கலக்கி விடணும். மூணு மாசத்துல மண்புழுக்கள் உருவாகி, நல்ல உரமா மாறிடும். இத நேரடியா நிலத்துல கொட்டலாம். விளைச்சல் சிறப்பா இருக்கும்'' என்று தேர்ந்த விவசாயி போல சத்யா சொல்லி முடிக்க, அவனையே பார்த்துக் கொண்டிருந்தோம்.

தென்னை... பப்பாளி... வாழை...

தென்னங்கன்றுகளை நட்டுவிட்டு, பலன் எடுக்க ஆண்டுக் கணக்கில் காத்திருப்பதெல்லாம் அந்தக்காலம். அரை காணி நிலமாக இருந்தாலும், குறுகிய காலத்தில் விளைச்சல் தரும் ரகங்களை நடுவது... கூடவே ஊடுபயிர், அடுக்குப்பயிர்... என்று சில தொழில்நுட்பங்களைக் கடைபிடித்து தொடர் வருமானம் பார்ப்பது... இந்தக் கால விவசாய பாணியாக இருக்கிறது! அந்த வகையில், தென்னைக்கு இடையில், பப்பாளி மற்றும் வாழையை சாகுபடி செய்து அசத்திக் கொள்ளுங்கள்.

''தென்னைக்குத் தென்னை அதிகபட்சம் 27 அடி இடைவெளி கொடுத்து நடவு செய்ய வேண்டும். நடவு செய்ததில், இருந்து நான்கு ஆண்டுகளுக்கு பயறு, தானியங்கள், காய்கள் மாதிரியான குட்டையான பயிர்களை ஊடு பயிராக சாகுபடி செய்யலாம். ஐந்து ஆண்டுகள் கழித்துத்தான் வாழை, பப்பாளி போன்றவற்றை நடவு செய்ய வேண்டும்.

பலதானிய விதைப்பு!

தென்னைக்கு இடையில் பல தானியங்களை விதைத்து பூ எடுத்ததும் மடக்கி உழ வேண்டும். கம்பு, கேழ்வரகு, சோளம், சாமை, வரகு போன்ற தானியங்களில் ஏதாவதொன்றில் 4 கிலோ; காராமணி, துவரை, அவரை, கொண்டைக்கடலை, மொச்சை, உளுந்து, பச்சைப்பயறு போன்ற பயறுகளில் ஏதாவதொன்றில் 4 கிலோ; நிலக்கடலை, சோயா, ஆமணக்கு போன்ற எண்ணெய் வித்துக்களில் ஏதாவதொன்றில் 4 கிலோ; சோம்பு, தனியா, மிளகு, சீரகம் போன்ற வாசனைப் பொருட்களில் ஏதாவதொன்றில் 1 கிலோ; சணப்பு, தக்கைப்பூண்டு, அவுரி, கொழுஞ்சி போன்ற பசுந்தாள் உரப் பயிர்களில் ஏதாவதொன்றில் 4 கிலோ... எனக் கலந்து விதைத்து, பூவெடுத்ததும் மடக்கி உழுவதுதான் பல தானிய விதைப்பு (எண்ணெய்வித்துப் பயிர்களில் கடுகு, எள் போன்றவற்றைப் பயன்படுத்தினால் ஒரு கிலோ மட்டுமே போதுமானது).

இருமடிப்பாத்தி!

பல தானியச் செடிகளை மடக்கி உழுது, பதினைந்து நாட்கள் கழித்து, இரண்டடி இடைவெளியில், நான்கு அடி அகலத்துக்கு நீளவாக்கில் இருமடிப்பாத்தி அமைக்க வேண்டும். பாத்திகளில் ஒரு பக்கத்தில் 8 அடி இடைவெளியில், ஒரு கன அடி அளவுக்குக் குழி எடுத்து, வாழை நடவு செய்ய வேண்டும். பாத்தியின் மறுபக்கத்தில், முக்கோண நடவு முறையில், இரண்டு வாழைகளுக்கு இடையில் ஒரு பப்பாளி வருவது போல நடவு செய்ய வேண்டும். அதாவது, 8 அடி இடைவெளியில் ஒரு கன அடி அளவுக்குக் குழி எடுத்து, பப்பாளிச் செடிகளை நடவு செய்ய வேண்டும்.

நடவுக்கு முன்பு ஒவ்வொரு குழியிலும் 10 கிலோ அளவுக்கு ஊட்டமேற்றிய தொழுவுரத்தை இட்டு நடவு செய்ய வேண்டும். ஒரு டன் எரு, தலா 20 கிலோ அசோஸ்பைரில்லம், பாஸ்போ-பாக்டீரியா, 50 லிட்டர் ஜீவாமிர்தம் அல்லது 5 லிட்டர் பஞ்சகவ்யா ஆகியவற்றை ஒன்றாகக் கலந்து நிழலான இடத்தில் குவித்து... தென்னை மட்டைகளால் மூடி ஒரு மாதம் கழித்து தண்ணீர் தெளித்து புரட்டி விட வேண்டும். மீண்டும் ஒரு மாதத்துக்கு அப்படியே வைத்துவிட்டால், ஊட்டமேற்றிய தொழுவுரம் தயார்.

மாதம் 100 லிட்டர்!

மாதம் ஒரு முறை, பாசன நீருடன் 100 லிட்டர் ஜீவாமிர்தத்தைக் கலந்து விட வேண்டும். இலை, தழை மற்றும் தோப்பில் கிடைக்கும் கழிவுகளை பாத்திகளின் மீது மூடாக்காகப் போடலாம். நடவு செய்த 6-ம் மாதத்தில் மரத்துக்கு 10 கிலோ வீதம் ஊட்டமேற்றிய தொழுவுரம் இட்டு மண் அணைக்க வேண்டும். இயற்கை முறையில் பெரும்பாலும் பூச்சிகள் வராது. அப்படியும் வந்தால், இயற்கைப் பூச்சிவிரட்டி தெளிக்கலாம்.

நடவு செய்த 4-ம் மாதத்தில் பப்பாளியில் பூவெடுக்கத் தொடங்கும். அந்த சமயத்தில், 10 பெண் மரங்களுக்கு ஒரு ஆண் மரம் என்ற கணக்கில் விட்டுவிட்டு, மீதி ஆண் மரங்களைக் கழித்து விட வேண்டும். இரண்டு ஆண்டுகள் வரை பப்பாளியில் மகசூல் எடுக்கலாம். அதன் பிறகு மொத்த மரங்களையும் அகற்றி, புதிதாக கன்றுகளை நடவு செய்ய வேண்டும். வாழை... 9-ம் மாதம் குலைதள்ளி, 12-ம் மாதத்தில் அறுவடைக்கு வரும்.''

மனமிருந்தால் மார்க்கமுண்டு ! - விவசாயம்.

' என்றதுமே... 'அதுக்கெல்லாம் ஏக்கர் கணக்குல நிலம், ஆள் பலம், பணம் எல்லாம் இருந்தாத்தான் சாத்தியம்’ என்பதுதான் பலருடைய கருத்தாக இருக்கும். ஆனால், ஏக்கர் கணக்கில் நிலமோ, பணமோ தேவையில்லை. மனதில் ஆர்வமும், அர்ப்பணிப்பும் இருந்தால்... கையகல நிலத்திலும், கலக்கலாக விவசாயம் செய்ய முடியும் என்பதை ஆங்காங்கே நிரூபித்துக் கொண்டிருப்பவர்களும் இருக்கத்தான் செய்கிறார்கள். 

முதல் வரிசையில ஓரடி அடி இடைவெளியில 150 சவுக்கு இருக்கு. அதுக்கு இடையில பாவக்காய், சுரைக்காய், மிளகாய், கத்திரி, தக்காளி இருக்கு. எதிர் பக்கத்துல 150 சவுக்கும், பத்தடி இடைவெளியில 15 சந்தன கன்னுகளும் நட்டிருக்கோம். சவுக்கு வளந்த பிறகு, நிலத்த சுத்தி வேலி மாதிரி ஆகிடும். ரெண்டாவது வரிசையில மூணடி இடைவெளியில 32 குமிழ் கன்னுகள் இருக்கு. அதுக்கு எதிர் பக்கத்துல பத்து அடி இடைவெளியில நாலு செஞ்சந்தனம் இருக்கு. இதுக்கான இடைவெளியில நாலு தென்னை, வாழை இருக்கு. மூணாவது வரிசையில பத்து அடி இடைவெளியில நாலு மாங்கன்னுகளும், 25 அடி இடைவெளியில 5 தென்னையும்,

5 வாழையும் கலந்து நட்டிருக்கோம். அதுக்கு எதிர்பக்கத்துல 5 அடி இடைவெளியில 22 சந்தனமும், ஒட்டுண்ணிச் செடியா மாதுளையும் நட்டிருக்கோம். நாலாவது வரிசையில 15 அடி இடைவெளியில பலாவும், அதுக்கு இடையில கொய்யாவும் நட்டிருக்கோம். எதிர் பக்கத்துல 8 அடி இடைவெளியில் 15 ரோஸ்வுட்டும், 15 சந்தனம் என 300 மரக்கன்றுகள் இருக்கு. சுத்தியும் மரப்பயிர்கள் போட்டதுக்கு பிறகு, ஒரு அடி இடைவெளியில 260 குழிகள் எடுத்து தர்பூசணி போட்டிருக்கோம்'' என்ற ராஜாமணி பண்ணையைச் சுற்றிக் காட்டிக்கொண்டே தொடர்ந்தார்.

பூச்சிகளைக் கட்டுப்படுத்தும் எறும்புகள்!

''ஓரடி ஆழத்துக்கு குழி எடுத்து... வேப்ப மரத்தூள் (மரம் அறுக்கும் ஆலைகளில் கிடைக்கும்), குப்பை உரம் (திடக் கழிவு), எரு இது மூணையும் சம அளவில் கலந்த கலவையில் ஒரு கைப்பிடி அளவு, ஒவ்வொரு குழியிலயும் போட்டு கன்னுகளை நட்டிருக்கோம். சரியா வேர் பிடிக்காத செடிகளைப் பக்கவாட்டுல தோண்டி, வேரோடு எடுத்து வேறொரு இடத்துல வெச்சுடுவோம். அஞ்சு நாளைக்கு ஒரு தடவை, அமுதக் கரைசலையும், 11 நாட்களுக்கு ஒரு தடவை ஜீவாமிர்தத்தையும் கொடுக்கிறோம். அமுதக் கரைசலை செடிகள்ல தெளிக்கிறப்போ, இனிப்புச் சுவைக்கு எறும்புகள் வருது. அந்த எறும்புகள் இலைகளைத் தாக்குற பூச்சிகளோட முட்டைகளை சாப்பிட்டுடுது. தவிர, 15 நாளைக்கு ஒரு தடவை வேப்பங் கொட்டைக் கரைசலையும் தெளிக்கிறோம்'' என்றார்.

பணம் தேவையில்லை...மனம் இருந்தால் போதும்!

மீண்டும் நம் முன் வந்த இளங்கோவன், ''சலுகை விலையிலதான் கன்னுகளை வாங்கினோம். தேங்காய் ஓலையிலயே ஷெட் போட்டுட்டோம். இப்படி எல்லாம் சேர்த்து கிட்டத்தட்ட 50 ஆயிரம் ரூபாய் வரைக்கும் செலவு செஞ்சுட்டோம். 2 மாசத்துல தர்பூசணி மூலமாவும், 3 மாசத்துல பூக்கள் மூலமாவும் வருமானம் கிடைக்கலாம். வருமானத்தைவிட, மனசுல ஆர்வம் இருந்தா... சின்ன இடத்துலகூட விவசாயம் செய்ய முடியுங்கிறதுக்கு உதாரணமா ஒரு மாதிரிப் பண்ணையா ஆக்கணும்ங்கிறதுதான் எங்களோட முக்கிய நோக்கம். இதன் மூலமா சிறு, குறு விவசாயிகளுக்கு ஒரு நம்பிக்கையை விதைக்க முடியும்... சுற்றுச்சூழலையும் காப் பாத்த முடியும்'' என்று அக்கறை பொங்கச் சொன்னார்!

சப்போட்டாவுக்கு நெல்லி... மாவுக்கு கொய்யா...

சப்போட்டாவுக்கு நெல்லி... மாவுக்கு கொய்யா...

'30 அடிக்கு 30 அடி இடைவெளியில் சப்போட்டா செடிகளை நடவு செய்ய வேண்டும். இரண்டு சப்போட்டா செடிகளுக்கிடையில் ஒரு நெல்லிச் செடியை நடவு செய்ய வேண்டும். 25 அடிக்கு 25 அடி இடைவெளியில் மா செடிகளை நடவு செய்துவிட்டு, இரண்டு செடிகளுக்கிடையில் ஒரு கொய்யா செடியை நடவு செய்ய வேண்டும். நடவு செய்வதற்கு, ஐப்பசி மாதம் சிறந்தது. 3 கன அடிக்கு குழி எடுத்து, ஒரு மாதம் குழிகளை ஆறப்போட வேண்டும். பின்னர், 10 கிலோ எருவோடு மேல்மண்ணைக் கலந்து முக்கால் பாகத்துக்குக் குழியை நிரப்ப வேண்டும். ஒட்டுச் செடிகளாக இருந்தால், ஒட்டுப்பகுதியானது, தரைப்பகுதியில் இருந்து அரையடி மேலே இருப்பது போன்று நடவு செய்து, உயிர் தண்ணீர் கொடுக்க வேண்டும்.

சப்போட்டாவில் கிரிக்கெட், பி.கே.எம்-1, பி.கே.எம்-2 ஆகிய ரகங்களும்; நெல்லியில் என்.ஏ-7, காஞ்சன், பி.எஸ்.ஆர் ஆகிய ரகங்களும்; மாவில் அல்போன்சா, பங்கனப்பள்ளி, இமாம்பசந்த், மல்லிகா, செந்தூரா போன்ற ரகங்களும்; கொய்யாவில் அலகாபாத், ஹைதராபாத், லக்னோ-49 ஆகிய ரகங்களும் சாகுபடி செய்வதற்கு சிறந்தது.

வளர்ச்சியைக் கூட்டும் பஞ்சகவ்யா!

பழச்செடிகளை நடவு செய்த 3 முதல் 4 ஆண்டுகள் வரையில் ஊடுபயிராக நிலக்கடலை, உளுந்து, தர்பூசணி மாதிரியான குறுகிய காலப்பயிர்களை சாகுபடி செய்யலாம். நான்கு ஆண்டுகள் வரையில் 6 மாதங்களுக்கு ஒருமுறை 4 கிலோ எரு, 1 கிலோ மண்புழு உரம், தலா 250 கிராம் வீதம் கடலைப் பிண்ணாக்கு, புங்கன் பிண்ணாக்கு, இலுப்பைப் பிண்ணாக்கு, வேப்பன் பிண்ணாக்கு ஆகியவற்றை  ஒன்றாகக் கலந்து ஒவ்வொரு செடியைச் சுற்றிலும் வைத்துப் பாசனம் செய்ய வேண்டும்.

6 மாதங்களுக்கு ஒருமுறை மரங்களின் வளர்ச்சிக்காக டேங்க் (12 லிட்டர்) ஒன்றுக்கு 1 லிட்டர் பஞ்சகவ்யாவை தண்ணீரில் கலந்து தெளிக்க வேண்டும். ஒரு ஏக்கருக்கு சுமார் 10 டேங்க் தெளிக்க வேண்டியிருக்கும்.

காய்ப்புக்கு வந்த மரங்களுக்கு, 6 மாதங்களுக்கு ஒருமுறை செடிகளுக்கிடையில் டிராக்டர் மூலம் களையெடுத்து, 10 கிலோ எரு, 2 கிலோ மண்புழு உரம், தலா 1 கிலோ வீதம் கடலைப் பிண்ணாக்கு, புங்கன் பிண்ணாக்கு, இலுப்பைப் பிண்ணாக்கு, வேப்பம் பிண்ணாக்கு ஆகியவற்றை  ஒன்றாகக் கலந்து ஒவ்வொரு செடியைச் சுற்றிலும் மண் வைத்து அணைத்து, பாசனம் செய்ய வேண்டும். மாதம் ஒருமுறை டேங்குக்கு (12 லிட்டர்) 1 லிட்டர் பஞ்சகவ்யா, 500 மில்லி வேப்பெண்ணெய் ஆகியவற்றை தண்ணீரில் கலந்து தெளித்துவிட வேண்டும். மேலும், 200 லிட்டர் பஞ்சகவ்யா, 2 லிட்டர் குணபசலம், 1 லிட்டர் ஆவூட்டம் ஆகியவற்றை ஒன்றாகக் கலந்து ஒவ்வொரு மரத்துக்கும், ஒரு லிட்டர் வீதம் ஊற்றிவிட வேண்டும். பூச்சித்தாக்குதல் இருந்தால் மட்டும், பூச்சிவிரட்டி தெளிக்கலாம்.

பிப்ரவரியில் சப்போட்டா... ஜூனில் நெல்லி...

நடவு செய்த மூன்றரை முதல் நான்கு ஆண்டுகளில் மரங்கள் காய்க்கத் துவங்கிவிடும். ஒவ்வொரு ஆண்டும்... சப்போட்டா மரங்கள்... நவம்பர் முதல் டிசம்பர் மாதங்களில் பூவைத்து, பிப்ரவரி முதல் மார்ச் மாதங்களில் காய்கள் அறுவடைக்கு வரும். நெல்லி மரங்களைப் பொருத்தவரைப் பிப்ரவரி முதல் மார்ச் மாதங்களில் பூவைத்து, ஜூன் முதல் ஜூலை மாதங்களில் அறு வடைக்கு வரும். மாமரங்கள் பிப்ரவரி மாதம் முதல் மார்ச் மாதங்களில் பூவைத்தால்... ஏப்ரல் முதல் மே மாதங்களில் அறுவடை செய்யலாம். கொய்யா மரங்கள்... ஏப்ரல் முதல் மே மாதங்களில் பூவைத்தால்... ஜூன் முதல் ஜூலை மாதங்களில் காய்களை அறுவடை செய்யலாம்.’ வறட்சிப் பகுதி என்பதால், கொய்யா ஒரு சீஸனில் மட்டுமே காய்க்கிறது.

மலைவேம்பு

மிலியா டுபியா மரத்தை வைத்து உங்கள் ஊரை செழிப்புஆக்குங்கள்

22செவ்வாய்,பிப்ரவரி,

மிலியா டுபியா வைத்து நீங்களும் கோடீஸ்வரனாகலாம்-ஒரு எளிய ஐடியா!
மிலியா டுபியா- மலைவேம்பு மரத்துக்கு தான் மிலியா டுபியா என்ற தாவரவியல் பெயர்.இதனை நட்டு வளர்த்தால் உங்கள் ஊர் வருமானம் பெரும்.

இது ஒரு ஐடியா அல்லது வேண்டுகோள், அவ்வளவு தான். யாரையும் நான் தவறாக விமரிக்கவில்லை. நன்றி!

தற்போது அமெரிக்காவில் இருக்கும் சாப்ட்வேர் என்ஜினியர்களின் கடந்த கால வாழ்விடங்கள் என்று பார்த்தால் அது தமிழ்நாட்டின் எங்கோ ஒரு மூலையில் இருக்கும் ஏதோ ஒரு சிறுநகரமாக இருக்கும், அல்லது கிராமமாக இருக்கும். ஆனால் அமெரிக்காவின் டாலர்கள் வந்த பிறகு அடையாறில் அபார்ட்மெண்ட் அல்லது பெங்களூரில் வீடு வாங்கி செட்டிலாகி இருப்பார்கள். எங்கிருந்து வந்தார்களோ அந்த ஊருக்கான பாதை பெரும்பாலும் மறந்து போயிருக்கும். இது தான் நடைமுறை.

இந்திய அப்பாவி, அன்றாடங்காய்ச்சி மக்களின் வரிப்பணத்தில் படித்து முடித்து விட்டு அடுத்த நாட்டு உழைக்கும் இவர்களை நொந்து கொள்ளவும முடியாது. காரணம், இந்திய ஆண்டிமுத்து ராசாக்கள், கல்மாடிகளின் அரசியலும் ஒரு காரணம். இங்கு வேலைவாய்ப்பு இல்லாததும் ஒரு காரணம். சரி இது போன்ற அயல்நாட்டு பணிகளில் இருப்பவர்கள் தங்கள் ஊருக்காக ஏதாவது ஒரு பயனை செய்யலாம் என்று நினைத்தால், அதை பணமாக கொடுத்தால் அந்த ஊர் மக்கள் சேவகர்கள் ஊர் மக்களுக்கு கூழ்காய்ச்சி ஊற்றி அவர்கள் நல்ல பெயரை எடுத்து விட்டு போய்விடுவார்கள். ஆக, என்ன செய்யலாம் என்பதே கேள்வி.

இதற்கு ஒரே வழி...அயல்நாட்டு நண்பர்களே! உங்கள் செலவில் ஒன்று முதல் 100 மரக்கன்று வரை உங்கள் கிராமத்தில் உங்கள் செலவில் நடச்சொல்லி உங்கள் சொந்த ஊரில் உங்களுடன் படித்த நண்பர்களிடம் கோரிக்கை வைக்கலாம். அதற்கான பராமரிப்பு செலவை நீங்களே ஏற்றுக் கொள்வதாக அவர்களுக்கு உறுதி அளிக்கலாம். இப்படி வளரும் மரத்திலிருந்து கிடைக்கும் வருமானத்தை அந்த கிராமப்பஞ்சாயத்துகள் எடுத்துக் கொண்டு அந்த பணத்தை மக்களுக்கு வசதிகள் செய்து தர செலவழிக்கலாம் என்று சொல்லுங்கள். மரத்தை வைத்தால் எப்படி வருமானம் வரும் என்பது தானே உங்கள் கேள்வி?

நான் உதாரணத்திற்கு மிலியா டுபியா என்ற தாவரவியல் பெயர் கொண்ட மலைவேம்பையும், அதன் பொருளாதார பயன்களையும் மட்டும் இங்கு பதிவிடுகிறேன். இது போல் ஏராளமான மரங்கள் இருக்கின்றன. அதை வரும் பதிவுகளில் பார்க்கலாம். வேப்ப மரங்களில் பல ரகங்கள் உள்ளன. இவற்றில் சில 1,மாரியம்மன் மடியில் வைக்கும் நாட்டுவேம்பு 2, மலை வேம்பு 3.சிவன்வேம்பு 4.துளுக்க வேம்பு 5.சக்கரை வேம்பு 6.நிலவேம்பு என்று முக்கியமான ரகங்கள் இவை.

நாம் பார்க்க போகும மலைவேம்பின் தாவரப்பெயர் (melia dubia). இந்த இனம் பொதுவாக நகரப்பகுதிகளில் அவ்வளவாக காணப்படுவதில்லை. இந்த இனமரங்கள் வேகமாகவும், நேராகவும் வளரக்கூடியவை. பழைக காலத்து ராஜாக்களின் அரண்மனையில் இந்த வகை மரங்களை பயன்படுத்தி சன்னல், கதவுகளை உருவாக்கியிருக்கிறார்கள். தேக்கு மரங்கள் புழக்கத்தில் இல்லாத காலத்தில் மலைவேம்பு தான் பெரிய அளவு பயன்பாட்டில் இருந்திருக்கிறது. 

இந்த மரங்களின் விதைகள் சீமை இழந்தை பழம் அளவுக்கு பெரியதாக இருக்கும். இதன் விதைகள் மிகமிக கடினமானவை. முளைப்புத் திறன் குறைவு. இந்த விதைகள் முளைப்பதற்கு 120 நாள் முதல் 180 நாட்கள் வரை ஆகிறது. இதன் காய்களை ஆடு, மாடுகள் விரும்பி உண்ணும். இப்படி சாப்பிடப்பட்ட விதைகள் இந்த விலங்குகளின் குடலில் சீரணமாகாமல் நல்ல சுழற்சி ஏற்பட்டு பல ரசாயன மாற்றங்களுக்கு உள்ளாகி மலக்கழிவில் வெளியே வருகிறது.

இது போல் இந்த மரத்தின் பழங்களை வெவ்வால்கள் விரும்பி தின்னும். இது போல் வெவ்வால்களின் உடலுக்குள் சென்று வெளியேறிய விதைகளும் மிகுந்த முளைப்புத்திறன் உடையதாக இருக்கும். இது போல் தான் இந்த விதைகள் காட்டுக்குள்ளும், நாட்டுக்குள்ளும் ஏராளமாக பரவி முளைத்து பெரிய மரங்களாக இன்றும் இருக்கின்றன.

இந்த மரத்தின் பயன்களை கண்ட இயற்கையாளர்கள் இந்த மரங்களில் தரமான விதைகளை எடுத்து நர்சரிகளில் வளர்த்துள்ளனர். தற்போது இந்த மரக்கன்றுகள் தமிழகத்தின் பல்வேறு இடங்களில் உள்ள தோட்ட செடிகள் விற்பனை செய்யும் நர்சரிகளில் கிடைக்கின்றன. 

மலை வேம்பை வளர்க்கும் வழி
இந்த மரக்கன்றுகளை வாங்கி ஒரு ஏக்கரில் 12 க்கு 12 அடி வீதம் 360 செடிகளை நடலாம். இந்த கன்று ஒன்று 10 ரூபாய் முதல் 15 ரூபாய் என்ற அளவிற்கு விற்பனை செய்யப்படுகிறது. இந்த மரம் 8 ஆண்டுகளில் சராசரியான உயரத்திற்கு வளர்ந்து விடுகிறது. அதாவது இந்த கால அளவில் இந்த மரத்தின் உயரம் 24 அடியையும் தாண்டிவிடுகிறது. அடிமரத்தின் சுற்றளவு 4 அடி வரை இருக்கும் என்கிறார்கள் அனுபவ விவசாயிகள். அதாவது சுமார் 30 கனஅடி இருப்பதாக வைத்துக் கொள்வோம். 

இந்த மரங்கள் மார்க்கெட்டில் கன அடி ஒன்றுக்கு 100க்கு விற்பனையாகிறது என்று வைத்துக்கொண்டால், ஒரு மரத்திற்கான விலை அதாவது 30 கனஅடி மரத்திற்கு 3 ஆயிரம் ரூபாய். இப்படி கணக்கில் எடுத்தால், ஒரு ஏக்கரில் வைக்கப்பட்ட 360 மரங்களுக்கு கிட்டத்தட்ட 10லட்சம் ரூபாய். பார்த்தீர்களா...லாபத்தை!

இந்த மரத்தின் தனித்தன்மையை பார்க்கலாம்.
இந்த மரம் தரிசு நிலத்தில் நன்றாக வளரும். வறட்சியை தாங்கும். இந்த மரத்தை பயன்படுத்தி பிளைவுட் பெருமளவில் தயாரிக்கிறார்கள். உலக நாடுகளில் இந்த மிலியா டுபியா பற்றி ஆய்வுகள் நடந்து வருகின்றன. காரணம், எரிபொருளின் தேவை அதிகரித்துக் கொண்டு போவதால் அதிக அளவில் விரைவில் வளரும் மரங்களை நடவேண்டியுள்ளது.

இந்த மரங்கள் பற்றி விவரங்கள் அறிய மாவட்ட வனத்துறை அலுவலகங்களை அணுகலாம். 

வீட்டில் தென்னை

வீட்டுக்கு ஒரு பிள்ளை வைத்தால் பயன்கள் தான் எத்தனையோ!!!

7திங்கள்,மார்ச்,

வீட்டுக்கு ஒரு மரம் வளர்ப்போம்...இப்படி தமிழ்நாட்டின் சாலைகளில் ஓடும் லாரிகளின் பின்புற தகட்டில் எழுதி வைத்திருப்பார்கள். மக்களை மரம் வளர்க்க தூண்டுவதற்கு இது உதவுமாம். (வேற என்னத்த சொல்ல கேட்டுக் கொள்ள வேண்டியது தான்). கோடிக்கணக்கில் செலவழித்து எத்தனையோ இலவசங்களை வழங்குகிறார்கள். இது போல் மரங்களை வாரி வழங்கியிருந்தால் இந்நேரம் தமிழ்நாடு மிகப்பெரிய மழைக்காடு நிறைந்த மாநிலமாக மாறியிருக்கும்.

ஆனால் யாரும் செய்யவில்லை. என்ன செய்வது?
இது இருந்து விட்டு போகட்டும். உங்களால் முடிந்தால், உங்கள் வீட்டில் சிறிய அளவு இடம் இருந்தால் போதும். ஒரு தென்னங்கற்றை நடவு செய்யுங்கள்.
அது உங்களுக்கு ஏராளமானவற்றை இலவசமாக வாரி வழங்கும். இது பற்றி பார்க்கலாம். இளநீர், தேங்காய், வீட்டு மொட்டை மாடியில் கூரையால் ஆன குளு குளு அறை, வீட்டை சுத்தம் செய்ய துடைப்பம், தலைக்கு தடவ எண்ணெய், தேங்காய் துருவல், வீட்டில் செடிகள் வளர்க்க கொடிப்பந்தல் அமைக்க கம்புகள் இப்படி தென்னையை பற்றி சொல்லிக் சொல்லிக் கொண்டே போகலாம்.

சரி...வீட்டில் தென்னை மரத்தை நட சிலருக்கு தயக்கமாக இருக்கும். காரணம், தென்னையின் வேர்கள் கட்டிடத்தை ஊடுருவி விடும் என்று பயப்படுவதுண்டு. இது போன்ற ஏராளமான சந்தேகங்கள் பலருக்கும் உண்டு. தென்னை ஆராய்ச்சியாளர்கள் தென்னை வளர்ப்பது பற்றி என்ன சொல்கிறார்கள் என்று தெரிந்து கொண்டால் தென்னை பற்றிய உங்கள் சந்தேகம் எல்லாம் தீரும். இதோ...

" தென்னைமரத்தை வீட்டில் வளர்த்தால் அதன் வேர் கட்டிடத்தின் அஸ்திவாரத்தில் ஊடுருவி விரிசல்களை ஏற்படுத்தும் என்ற பயம் தான் தென்னையை வீடுகளில் வைக்க பலரும் தயங்குவதற்கு காரணம். ஆனால் உண்மை அதுவல்ல. தென்னை மரம் பார்க்க தான் கடினமாக உள்ளதே தவிர, அதன் வேர்கள் சாதாரண சல்லி வேர் வகைளை சேர்ந்தது. இந்த வேர்கள் கொத்துகொத்தாக இருக்கும். பூமியின் ஆழத்தை நோக்கி போகாது. கிடைமட்டமாக 100 அடி தூரம் வரை செல்லக்கூடியது. இது கடினமான பாறை பகுதியை குடைந்து செல்லக்கூடிய அளவுக்கு பலம் வாய்ந்தது என்று சொல்ல முடியாது. எனவே கட்டிடத்தின் கட்டுமானத்தை ஊடுருவி சிதைத்து விடும் என்றெல்லாம் பயப்பட தேவையில்லை. 

பொதுவாக தென்னம் பிள்ளையை வீடுகளில் நடும் போது வீட்டின் சுவர் மற்றும் காம்பவுண்ட் சுவரிலிருந்து 6 அடி இடைவெளி விட்டு மரக்கன்றை நட வேண்டும். இதனால் வீட்டின் சுவர் பாதிக்கப்படுவதில்லை.
இரண்டரை முதல் மூன்று அடி நீள, அகல, ஆழத்தில் குழி தோண்டி சிறிது காலம் அதனை ஆற விட்டு பிறகு தான் மரத்தை நடவேண்டும். அப்படி நடும் முன் வீடுகளில் வீணாகும் காய்கறி கழிவுகளை இந்த குழியில் போட்டு மக்க செய்து உரமாக மாற்றி விடலாம். பிறகு கன்றை நடலாம்.

தென்னை நன்றாக காய்க்க தழைச்சத்து, மணிச்சத்து, சோடியம், கால்சியம் போன்ற சத்துகள் அதிகம் தேவைப்படும். பொதுவாக மண்ணில் எல்லாசத்துகளும் இருக்கிறது. தென்னையை நடும் முன் மண் மாதிரி எடுத்து அதனை மண்பரிசோதனைக்கூடத்தில் கொடுத்தால், அந்த மண்ணில் என்ன மாதிரியான சத்துகள் உள்ளது என்பதை தெளிவாக தெரிந்து கொள்ள முடியும். 

மழை பெய்யும் காலங்களில் ஏற்படும் இடி, மின்னலின் போது, காற்று மண்டலத்தில் பயங்கர வெப்பம் ஏற்படும். அப்போது, காற்று மண்டலத்தில் உள்ள நைட்ரஜன் இந்த வெப்பத்தால் தாக்கப்பட்டு நைட்ரஜன் ஆக்சைடாக மாறும். இது மழை நீருடன் கலந்து நீர்த்த நைட்ரிக் அமிலமாக மண்ணில் வந்து விழுகிறது. இப்படி பூமிப்பந்தில் நம்மை அறியாமல் நடக்கும் சில ரசாயன கிரியையைகள் மூலமாக மரங்களுக்கு உரங்கள் கிடைத்து விடுகின்றன. அதாவது இப்படி கிடைக்கும் சத்தை தழைச்சத்து என்று சொல்வார்கள். 

ஒரு தென்னை மரத்தை தூரத்தில் நின்று பார்க்கும் போது, அது நல்ல பச்சையாக தெரிந்தால், அதற்கு தழைச்சத்து (யூரியா) தேவையில்லை என்று தெரிந்து கொள்ளலாம். அதே போல் ஒரு பாளை பூத்து விரியும் போது, அதில் 20 க்கும் மேற்பட்ட பிஞ்சுகள் இருந்தால், மரத்திற்கு மணிச்சத்து போதுமான அளவில் மண்ணிலிருந்து கிடைத்துக் கொண்டிருக்கிறது என்ற முடிவுக்கு வரலாம்.

மரம் காய்க்கும் காலம் வந்த பின்னும், காய் பிடிக்காமல் பிடிக்காமல் உதிர்வதும், போதுமான காய்கள் விளையாமல் போவதற்கும் சில மறைமுக  வியாதிகள் மற்றும் சிறு நோய்கள் தான் இதற்கு காரணம். மறைமுக வியாதி எப்படி உருவாகிறது என்று பார்க்கலாம். தென்னைமரத்தின் மட்டை தானாக காய்ந்த நிலையில் மரத்திலிருந்து கீழே விழும். அப்போது கூடவே பழுப்புகலரில் காய்ந்த எருவின் துகள் போன்று தரையில் கொஞ்சம் சிதறி விழுந்து கிடப்பதை காண முடியும். இது எங்கிருந்து வந்தது  என்பது புதிராக இருக்கும். 

இது, அந்த மட்டை மரத்தில் இருக்கும் போது, மரத்தின் பாளையிலிருந்து விழும் பூ, பிஞ்சு, வேறு அருகில் உள்ள மரத்தின் இலைகள் போன்றவை இந்த மட்டை மரத்தில் இணைந்திருக்கும் இடத்தின் இடுக்கில் வந்து சேர்ந்து விடும். இப்படி தேங்கி கிடக்கும் இந்த குப்பை பல நாட்களாக ஈரம், மரத்திலிருந்து வெளியாகும் நீராவி ஆகியவற்றால் நனையும் போது பூஞ்சை கிருமிகளால் அழுகி, மக்கி எரு போல் மாறி விடும்.

சில நேரங்களில் இந்த எருவில் ஒரு வகை கிருமிகளும் தோன்றி விடுகிறது. இந்த கிருமிகள் புதிதாக மரத்தில் தோன்றும் பாளைகளில் ஒட்டிக்  கொண்டு அதன் சாறை உறிஞ்சத் தொடங்கும். இதனால் தான் புதிதாக தோன்றும் பாளைகள், சிறுத்தும், நீளம் குறைந்தும் இருக்கும். பிஞ்சுகளும் கருகி கொட்டி விடும். நகரங்களில் உள்ள தென்னை மரங்களை சுத்தம் செய்ய மரம் ஏறுபவர்கள் வருவார்கள்.

அவர்களை கொண்டு குறிப்பிட்ட அளவில் மரத்தை சுத்தம் செய்தால், இந்த பிரச்சனையை தவிர்த்து விடலாம். மரத்தை இப்படி சுத்தமாக வைத்துக் கொண்டால், புதிதாக வரும் பாளைகள் அதிக நீளமாக, பருமனுடன் இருக்கும். நல்ல பசுமை நிறத்திலும் இருக்கும். இப்படி இருக்கும் பாளையில் அதிகம் பிஞ்சு பிடித்து தேங்காய் குலைகுலையாக காய்க்கும் என்பது அனைவருக்கும் தெரியும்.

தென்னைக்கு ஏதாவது ஒரு சூழ்நிலையில் உரம் வைக்க வேண்டுமென்றால், மரத்திலிருந்து 3 அடி தள்ளி, வேர்கள் அறுபடாமல், அரை வட்டம் போட்டு, ஒரு கிலோ அளவு வேஸ்டு மட்டை, கொளிஞ்சி தழை சருகுகளை போட்டு கூடவே 50 கிலோ அளவுக்கு தொழுஉரம் போட்டு 10 நாட்களுக்கு ஒரு முறை தண்ணீர் விடலாம். தென்னை மரத்தை பொறுத்த மட்டில் காண்டா மிருக வண்டு தான் பெரிய பிரச்சனை. இந்த வண்டு மரத்தை தாக்கும் போது, மரத்தின் மணல் பகுதியிலிருந்து 3 அங்குலத்துக்கு மேல் ஓட்டையிட்டு, குருத்துக்குள் சென்று, உட்குருத்தை தின்று விடும். 

பொதுவாக இந்த வண்டை ஒழிக்க உள்ள மருந்துகளை மரம் முழுக்க பரவலாக  பயன்படுத்தும் போது, மரத்திற்கு நன்மை செய்யும் தேனீக்கள், வண்ணத்துப்பூச்சிகளும் இந்த மருந்துகளால் செத்து விடுகின்றன. இதனால் மகரந்த சேர்க்கை தடைபட்டு காய்களின் அளவும் குறையும். இதனை தடுக்க வி.எஸ் மிக்ஸ் என்ற பவுடரை 15 கிராம் எடுத்து அதை 200 மிலி தண்ணீரில் கரைத்து குருத்தில் ஊற்றினால், வண்டுகள் தாக்குவதில்லை. பொதுவாக வீடுகளில் மரம் இருந்தால், துணியை வெயிலில் உலர்த்த மரத்தில் ஆணி அடித்து கொடிகட்டுவதோ, வேறு காயப்படுத்தவோ கூடாது. 

வீட்டு மரத்திற்கு ஆண்டுக்கு 30 ரூபாய் செலவு செய்தால் கூட, மரத்திலிருந்து 300காய்கள் வரை பெறலாம். வீடுகளில் வளர்க்கப்படும் தென்னம்பிள்ளைகளுக்கு அவ்வப்போது மண்புழுஉரம், வீட்டில் வீணாகும் காய்கறி கழிவுகளை மக்க வைத்து தயார் செய்யப்பட்ட உரம் மற்றும் தென்னை நார்க்கழிவை மக்க செய்து தயாரித்த உரம் ஆகியவற்றை உரமாக பயன்படுத்தலாம்.

இதற்கு பெரிய நுட்பம் எதுவும் தேவையில்லை. வீட்டு மூலையில் சிறிய குழி தோண்டி அதில் இந்த கழிவுகளை போட்டு அதில் சிறிது பசுஞ்சாணத்தை கரைத்து ஊற்றினால் சிறிது நாளில் நல்ல உரம் ரெடி. பிறகென்ன.....சிறிது நாளில் வீட்டுக்கு தங்குதடையில்லாமல் தேங்காய் தயார். ஏப்ரல், மே, ஜுன் மாதங்களில் உடலை குளிர்விக்க இளநீரும் தயார். வீட்டு சமையலுக்கு தேங்காய் தயார். 

எங்க கிளம்பிட்டீங்க...தென்னம் பிள்ளை வைக்கவா?


ஒரு நிமிடம்!!

• பறிக்கப்படும் தேங்காய்கள், இட்லிக்கு சட்னியாவதும், ஆப்பத்துக்கு பாலாகும் போதும், ஏப்ரல் மாத வெயிலில் இளநீர் ஆவதுமாக தென்னையின் பயன்களை சொல்லிக் கொண்டே போகலாம். 
   
• இளநீருக்கு மனிதரின் முதுமையை குறைக்கும் ஆற்றல் பலமாக இருப்பதை தற்போது விஞ்ஞானிகள் கண்டுபிடித்துள்ளனர்.
   
• தென்னை மரத்தின், இலை, தண்டு, பூ, மடல், தேங்காய் பிசிறுகள் என்று அனைத்துமே மனிதர்களுக்கு ஏதாவது ஒரு வகையில் பயன்படுகிறது. 
  தேங்காய் நார்களை கொண்டு தற்போது அழகான மிதியடிகள், தரைவிரிப்புகள் செய்யப்பட்டு விற்கப்படுகின்றன. 
• தேங்காய் ஓட்டை சிறுசிறு துண்டுகளாக வெட்டி சட்டை பித்தான்கள் செய்யவும், எரிபொருளாகவும், நாதஸ்வரக்குழாய்களுக்கு தேவையான வில்லைகள் செய்யவும் பயன்படுகிறது. 
   
• மரத்தின் தண்டு எரிபொருளாகவும், வீட்டுக்கான உத்திரம் போடவும், தூணாகவும் இருக்கிறது. கிராமங்களை கடந்து செல்லும் நீரோடைகள், கால்வாய்களை கடக்க தென்னை மரத்தின் தண்டு இருப்பதை பல இடங்களில் பார்க்க முடியும்.                                                                                            
   
• தென்னை ஓலை தான் இன்றைய டிஜிட்டல் காலத்திலும் நகர வீடுகளின் குளிர்ச்சியான கூரை வேய்ந்த அறைகளை உருவாக்க முதல் தேர்வாக இருக்கின்றன. 
   
• மரத்தின் பாளையை, அதாவது பூமடலை நீரில் ஊற வைத்து ஊசியினால் சீராக நீளமாக கிழித்து எடுத்து அதனை வேலி கட்டவும், கூரை வேயவும் பயன்படுத்துகிறார்கள். 
   
• தென்னை ஈர்க்குகள் வீடு சுத்தம் செய்ய துடைப்பமாக மாறிவிடுகிறது. 
  உலர்ந்த கொப்பரையிலிருந்து கிடைப்பது தேங்காய் எண்ணெய். 
• காலையில் எழுந்தவுடன் தேங்காய் எண்ணெயை தலைக்கு தடவி குளித்தால் தான் பூரணமாக குளித்த சுகம் கிடைக்கும். தென்னை அதிகம் வளரும் பகுதிகளில் தேங்காய் எண்ணெய் தான் பிரதான சமையல் எண்ணெயாக பயன்படுகிறது. 
   
• தேங்காயை அரைத்துப் பிழிந்தெடுக்கப்படும் தேங்காய் பால் இனிப்பும், துவர்ப்பும் சேர்ந்த ஒரு கலவை. இது குடல்புண், வாய்ப்புண்களை குணப்படுத்த சிறந்த மருந்தாக இருக்கிறது.

 செவ்விளநீர் என்ற பெயரில் ??????
பச்சை இளநீர் சுவையில்லை என்று செவ்விளநீர் குடிப்பவர்கள் பலர். ஆனால் இது உண்மையான செவ்விளநீர் ஆகுமா...என்றால் அந்த பெயரில் ஒரு சாதாரண இளநீரை குடித்து விட்டு திருப்தி அடைகிறோம் என்று தான் அர்த்தம். வேளாண்மை அதிகாரி முரளிகிருஷ்ணன் கூறும் போது, தமிழ்நாட்டில் செவ்விளநீர் மரங்கள் இல்லை. சொல்லிக் கொள்ளும்படி 3 அல்லது 4 தாய் மரங்கள் தான் உள்ளன என்கிறார். இங்கு ரோடுகளில் விற்கப்படும் இளநீர் காய்கள், மலேசிய நாட்டிலிருந்து கொண்டு வரப்பட்டமலேசியன் ஆரஞ்சு ரக தென்னையின் காய்களாகும்.

இது இளநீருக்காகவே உருவாக்கப்பட்ட ரகம். இதைத்தான் செவ்விளநீர் என்ற பெயரில் ரோடுகளில் விற்கிறார்கள். உண்மையான செவ்விளநீர் மரத்தின் காய்களை ருசித்தவர்கள் குறைவு. உண்மையான செவ்விள நீர் மரக்கன்று வாங்க விரும்புபவர்கள் அருகில் உள்ள வேளாண்மை அலுவலகங்களை தொடர்பு கொண்டால் வாங்கலாம். ஆனால் ஆர்டர் செய்த 1 ஆண்டு கழித்து தான் கன்று கிடைக்கும்.

மகாகோனி மரம்

மாடி வீட்டு மனிதருக்கு காற்றை வடி கட்டி சுவாசிக்க தரும் மகாகோனி மரம்

2செவ்வாய்,ஆகஸ்ட்,

மகாகோனி மரம்

எங்கு  நோக்கினும் இப்போது மரம் வளர்ப்பு விழிப்புணர்வு பெருகி வருகிறது. பொதுவாக மரங்களினால் பல்வேறு பயன்கள் என்றாலும், சில மரங்கள் பொருளாதார ரீதியாக அதிக பயனை தருகிறது. உதாரணமாக மா மரத்தை எடுத்து கொள்வோம்.சீசனில் ஏராளமான மாம்பழங்களை தரும்.நமக்கு மாம்பழங்களை கடையில் வாங்கும் செலவு மிச்சம்.

இது போல் ,மனிதனுக்கு ஆதிகாலத்திலிருந்து மரங்கள் குடியிருப்புகளாக, கடலில் செல்ல கப்பல் தயாரிக்க உதவும் மூலப்பொருளாக, காய்கள், பழங்கள் தரும் உணவு பயிராக என்று எத்தனையோ வழிகளில் பயனுள்ளதாக இருந்து வந்திருக்கின்றன. மரங்கள் இல்லாமல் மனித வாழ்க்கை இல்லை என்பது தான் உண்மை நிலை.

விலை உயர்ந்த மரங்கள்

 எத்தனையோ பயன்பாடுகள் இருந்தாலும், கட்டிடங்கள் கட்டும் போது நிலைக்கதவுகள், ஜன்னல்கள் வடிவமைக்க நீடித்து உழைக்கக்கூடிய, பார்ப்பதற்கு அழகாக காட்சி தரும் தேக்கு, ரோஸ்வுட் மற்றும் மலேசியாவிலிருந்து இறக்குமதி செய்யப்படும் படாக் மரங்கள் போன்ற விலை உயர்ந்த மரங்கள் தான் பெருமளவில் பயன்படுத்தப்படுகின்றன.

தமிழ்நாட்டில் லட்சக்கணக்கிலான எக்டரில் தரிசுநிலங்கள் இருக்கின்றன. இந்த இடங்களில் எல்லாம் குறிப்பிடத்தக்க பயன்தரும் மரங்களை நட்டு வளர்த்தால் இறக்குமதி மரங்களுக்கு அவசியம் இருக்காது. கூடவே மரங்கள் அதிகமாக வளர்க்கும் போது மழை பொழிவும் அதிகம் ஏற்படும். விவசாயம் செழிக்கும்.

மரங்கள் வளர்ப்பு லாபம் நிறைந்த விவசாயமாக தற்போது வளரத் தொடங்கியிருக்கிறது. இந்த நிலையில் நிலங்களில் நல்ல லாபம் தரும் மரங்களை நட்டு வளர்த்தால் குறிப்பிட்ட காலகட்டத்தில் நல்ல லாபத்தை தரும். இந்த மரங்கள் மக்களுக்கு குறைந்த விலையில் கிடைப்பதும் முக்கியம்.

மகாகொனி மிலியேசி

இப்படி விவசாயிகளுக்கு வளம் தரும் மரங்களில் ஒன்றாக இருப்பது தான் மகாகொனி மிலியேசி. மேற்கிந்திய தீவுகளை தாயகமாக கொண்டது இந்த மரம். டொமினிக் ரேபுப்ளிக் என்ற சிறிய நாட்டின் தேசிய மரம் வேறு. இது தற்போது அழியும் நிலையில் உள்ள மரங்களின் பட்டியலில் இருப்பது தான் வேதனை.

இந்த மரம் முதன்முதலாக இந்தியாவை ஆண்ட கிழக்கிந்திய கம்பெனியர்களால் ஜமைக்காவிலிருந்து கொண்டுவரப்பட்டு கல்கத்தாவில் உள்ள தாவரவியல் தோட்டத்தில் வளர்க்கப்பட்டன. பின்னர் சென்னைக்கு கொண்டுவரப்பட்டு சென்னை தோட்டக்கலை துறை சொசைட்டியில் நாற்று விடப்பட்டது.

அடையாறு தியாசபிகல் சொசைட்டி மற்றும் ஒரு சில இடங்களிலும், உளுந்தூர் பேட்டை வனத்துறை அலுவலகம், சித்தேரி வனத்துறை ஓய்வூதிய இல்லம் என்றும் சில இடங்களில் நடப்பட்டன. ஆனால் இந்த மரங்கள் பரவலாக வளர்க்கப்படவில்லை. மகாகொனி மரம் 4.5 மீட்டர் சுற்றளவுடைய அடிமரத்துடன், 25 மீட்டர் உயரத்திற்கு வளரும் இயல்புடையது. இலையுதிர் மரவகையை சேர்ந்த இந்த மரம். மரத்தின் உச்சியில் கிளைகளை பரப்பிக் கொண்டு 910 மீட்டர் சுற்றளவுக்கு தழையமைப்புடன் கம்பீரமாக காட்சியளிக்கும். இதன் மரப்பட்டைகள் சிவப்பு கலந்த கருமைப்பட்டையுடன் இருக்கும். 

பயிரிட

வேப்ப மரத்தின் இலையை போன்று கூட்டிலை உடையது. ஏப்ரல் மாதத்தில் மகாகொனி மரம் பூக்கும். 3.5 மீ நீளக் காம்புடைய பூங்கதிர்கள் 8 செ.மீ நீளத்தில் இருக்கும். பூக்கள் மஞ்சள் நிறத்தில் இருக்கும். இந்த மரம் ஆண்டிற்கு 1000 மில்லி மீட்டர் மழை அளவு பெறும் இடங்களில் நன்றாக வளரும். வடிகால் திறனும், ஆழமான மண்கண்டமும் உள்ள இடங்கள் மககொனி வளர்க்க சிறந்த இடங்கள். மற்ற மரங்களை விட மககொனி மரத்திற்கு சத்து அதிகம் கொண்ட மண்வாகு தேவைப்படும்.

தமிழ்நாட்டில் ஒரளவு நீர்செழிப்புள்ள இடங்களில் பயிரிடலாம். மதுரை மாவட்டத்தின் வைகை ஒடிவரும் நீர்பிடிப்பு பகுதிகள் (ஆற்றுப்படுகைகள்) உள்பட நீர்செழிப்புள்ள மேட்டுப்பாங்கான இடங்கள் ஏற்றவை. செவ்வல் கண்மாய் கரைகளும் ஏற்றவை. தனியார் தோட்டங்களில் காற்றுத்தடுப்பு வரிசைகளில் நடலாம். நகரங்களில் அதிக மழையுடைய பகுதிகளில் கட்டிட வளாகங்களில் ஒரு வரிசையாக மகாகொனி மரங்களை நடலாம். மாடிகளில் உள்ளவர்களுக்கு காற்றை வடிகட்டி கொடுக்கும்.

நல்ல மகாகொனி மரம் உருவாக 20 ஆண்டுகள் பிடிக்கும். நடும் பொழுது 6 6 மீட்டர் இடைவெளியில் நடலாம். பின்னர் களைகளை நீக்கி கொத்திக் கொடுக்க வேண்டும். நிழல் உள்ள இடங்களில் நட்டால் வளர்ச்சி குன்றிவிடும். பாசனமளித்தால் கன்றுகளில் 90 சதவீதம் துளிர்த்து விடும். இரண்டு ஆண்டுகளில் 96 செ.மீட்டர் அளவிற்கு உயர்ந்து வளரும். எனவே பாசனமுள்ள இடங்களில் தொடக்க காலத்தில் நீர் ஊற்றி வளர்ப்பது நல்லது. 

பதனப்படுத்த

 20 முதல் 40 ஆண்டுகளில் செழிப்பாக வளர்ந்து விடும் மரத்தை, இலகுவாக பதனப்படுத்தலாம். காற்றில் உலரவிட்டாலே பதனப்படும். காளவாய் முறையிலும் பதனப்படுத்தலாம். சாதாரணமாக, வெடிப்போ சுருக்கமோ ஏற்படுவதில்லை. நீடித்து உழைக்கக்கூடியதுகரையான்களும் அரிப்பதில்லை. கைக்கருவிகளால் நன்றாக இழைக்கலாம். பாலிஷ் ஏற்ற வலுவான மரம். சிவப்புக்கருமை நிறத்தையுடைய இந்த மரம் தங்கத்தின் பளபளப்புடன் காணப்படும். ஒரு கனமீட்டர் மரத்தின் எடை சுமார் 750 கிலோ இருக்கும்.

இந்த மரத்தை அழகிய வேலைப்பாடுகள் உள்ள மேஜை, நாற்காலிகள், சட்டமிட்ட கதவுகள், பீரோக்கள் மற்றும் பல கடைசல்களுக்கும் ஏற்றது. இசைக்கருவிகள் செய்ய ஏற்றது. கப்பல் கட்டுவதற்கும், பல வகையான கட்டுமான பொருட்கள் செய்வதற்கும், பென்சில் செய்வதற்கும் கூட ஏற்ற மரம் இது.

என்றைக்கும் நல்ல வளர்ச்சியுள்ள கட்டுமானத்துறைக்கு மரத்தின் தேவைப்பாடு அதிகம் இருப்பதால் மர விவசாயம் எதிர்காலத்தில் நல்ல லாபம் தரும் தொழிலாக இருக்கும் என்பதில் மாற்றமில்லை. இந்த மரம் பற்றி விவரங்கள் அறிய அந்தந்த மாவட்டங்களில் உள்ள வனத்துறை அலுவலங்களை அணுகலாம்.

‘‘மகோகனி விதைகள் மருத்துவக் குணம் கொண்டவை என்று கேள்விப்பட்டோம். இது உண்மையா?’’

க.சுந்தரம், பல்லடம்.

கோயம்புத்தூரில் உள்ள வன மரபியல் மற்றும் மரப்பெருக்கு நிறுவனத்தின் விதைத் தொழிற் நுட்பவியல் துறை, விஞ்ஞானி முனைவர்.ம.வே.துரை பதில் சொல்கிறார்.

‘‘சமீபகாலத்தில் அறிவியல் அறிஞர்கள் நூற்றுக்கும் மேற்பட்ட தாவரங்களுக்கு நீரிழிவு நோயினைக் கட்டுப்படுத்தும் தன்மை உள்ளதைக் கண்டறிந்துள்ளனர். அந்தத் தாவரங்களின் வரிசையில் மகோகனியும் ஒன்றாகும். உலக சுகாதார அமைப்பு (WHO), பாரம்பர்ய மருத்துவத்தின் மூலம் நீரிழிவு நோயைக் கட்டுப்படுத்துவதற்கு மகோகனியைப் பரிந்துரை செய்திருக்கிறது. இதிலிருந்தே அம்மரத்தின் பயனை நாம் அறிந்துகொள்ளலாம்.

தென்அமெரிக்காவைத் தாயகமாகக் கொண்ட இந்தத் தாவரம் உயரமாக வளரக்கூடிய மரமாகும். இந்தியாவைப் பொறுத்தவரை, நம்மை ஆட்சி செய்த கிழக்கிந்திய கம்பெனியரால் கொல்கத்தாவில் உள்ள தாவரவியல் பூங்காவில் 1795 -ல் இது அறிமுகப்படுத்தப்பட்டது. அதன் பின்னர் மகோகனி இந்தியாவில் பல்வேறு மாநிலங்களில் மரத்துக்காகவும், அலங்கார மரமாகவும் பயிரிடப்பட்டது. தற்போது மிகவும் பழமையான மகோகனி மரங்கள் அதிக அளவில் தென்இந்தியாவில் குறிப்பாக கேரளா, தமிழ்நாடு மற்றும் கர்நாடகாவில் காணப்படுகின்றன.

சிறந்த மரவேலைகளுக்கு மட்டுமல்ல, மருந்துப் பொருளாகவும் பயன்படுகிறது. நீரிழிவு நோய், மூட்டுவலி, வயிற்றுப்போக்கு, காய்ச்சல், மலேரியா, இருமல் மற்றும் ரத்த அழுத்தம் ஆகிய நோய்களைக் குணப்படுத்த, மலேசிய மக்கள் பல தலைமுறைகளாக இம்மரத்தைப் பயன்படுத்தி வருகின்றனர். இதன் பலன்களை உணர்ந்ததால், ‘சர்வ ரோக நிவாரணி’ (All Cure Medicine) என்று மலேசிய மக்களும், ‘தாவரங்களின் ராணி’ என்று தென் பசிபிக் கடலில் இருக்கும் சாலமன் தீவு மக்களும் அழைக்கின்றனர். மலேசியாவில் மகோகனி விதையிலிருந்து எடுத்த கஷாயத்தைத் தோல் வியாதிகளுக்கும், வெட்டுப் புண்ணைக் குணப்படுத்துவதற்கும் பயன்படுத்துகின்றனர்.  சாலமன் தீவு மக்கள் நீரிழிவு, ரத்த அழுத்தம், ஒவ்வாமை, நாளமில்லாச் சுரப்பிகளின் சீர்கேடு... போன்றவற்றைக் குணப்படுத்த இதன் விதைகளைப் பயன்படுத்தி வருகின்றனர்.

வெள்ளை நிறத்தில் உள்ள காய்ந்த மகோகனி விதைகள் மிகவும் கசப்புத்தன்மை உடையவை. தினமும் ஒன்று அல்லது இரண்டு முழு மகோகனி விதைகளைச் சாப்பிடலாம். இதை உணவு உட்கொள்வதற்கு அரை மணி நேரம் முன்பாக உண்டு வந்தால், நீரிழிவு கட்டுக்குள் வந்துவிடும். மேலும் மகோகனி விதையில், புற்றுநோய், நெஞ்சுவலி, குடல்புண் போன்ற நோய்களையும் குணப்படுத்தும் தன்மை உள்ளது. மகோகனி பழம், வைட்டமின்கள்- A, B1, B6, D மற்றும் E நார்ச்சத்து, ஃபோலிக் அமிலம், புரதம் மற்றும் மாவுச்சத்து போன்ற ஊட்டச் சத்துக்களையும் உடலுக்கு அளிக்கின்றன.

தமிழ்நாட்டில் உள்ள நாட்டுமருந்து கடைகளில் தேன் கொட்டை என்ற பெயரில் இந்த விதைகள் விற்பனை ஆகின்றன. 100 கிராம் ரூ.10 க்கு விற்பனை செய்யப்படுகிறது.’’

தொடர்புக்கு, செல்போன்: 94459-44288.